O Equipo de Actividades Extraescolares e Complementarias organizou un novo xogo de pistas para realizar na derradeira semana antes das vacacións de Nadal.
O xogo consistiu no visionado do seguinte vídeo:
Como levamos facendo nos últimos cursos, celebramos o Día das bibliotecas organizando a Xornada de Portas Abertas para presentar ás familias o novo Proxecto Documental Integrado que este ano leva por título: Somos artistas.
Acudiron 60 familias cun total de 171 participantes que realizaron unha chea de retos pasando por todas as zonas da nosa biblioteca:
1. ESCENARIO: Somos poetas. A partir de dúas palabras dadas hai que inventar un poema, escribilo e recitalo enriba do escenario.
2. ZONA SOFÁS: Somos mimos. Xogo dos xestos. Cada familia escollerá unha carta do xogo e mentras un representa a palabra da carta o resto da familia terá que adiviñala.
3. SALA DE XOGOS: Somos arquitectos. Cada familia terá que facer unha construción coas pezas do xogo Kapla segundo a carta que lles toque.
4. CROMA. Somos actores. Gravación de representacións seguindo as instrucións das cartas do xogo "Lo tuyo es puro teatro".
5. SALA INFORMATIVOS. Somos debuxantes. Deseñamos o logo do proxecto.
6. ZONA ROBÓTICA. Somos construtores. Construír un obxecto coas pezas Lego a partir dunha carta que lles toque: casa, ponte, xarrrón, avión, coche, animal...
7. CINE. Somos espectadores. Visionado da curtametraxe "Na pel do resto" feita polo alumnado hai dous cursos escolares no PDI Alucine.
8. ZONA DE IMPRESIÓN 3D. Somos escultores. Terán que intentar adiviñar o obxecto que hai oculto nunha bolsa co tacto, logo con plastilina terán que facer o mesmo obxecto.
9. ESTUDIO DE RADIO. Somos cantantes. Karaoke.
O martes 22 de outubro de 16:30 a 18:30 h. celebraremos a nosa tradicional Xornada de Portas Abertas coincidindo coa semana do Día das bibliotecas escolares. Presentaremos o novo Proxecto Documental Integrado deste curso 2024-2025 : Somos Artistas.
Todas as familias estades invitadas a participar. Precisamos que fagades a inscrición previa para poder organizar o evento con tempo así que enviamos esta semana a través dos nenos e as nenas unha circular coa ficha de inscrición.
Tedes ata o venres día 18 de outubro para entregala aos titores/as dos vosos fillos, unha por familia.
Animádevos a participar, será unha xornada moi moi divertida.
Para rematar o curso celebramos a entrega de Diplomas ao alumnado que finalizou a etapa de Educación Infantil e a entrega de diplomas aos de 6º de Ed. Primaria que marchan para o Instituto o vindeiro curso.
Despois as familias poideron disfrutar dun festival cheo de actuacións con cancións dos anos 70, 80 e 90 como despedida e peche do PDI 50 Anos de Historia.
E para terminar a xornada lectiva, os nenos e nenas disfrutaron de xogos populares e tradicionais.
Aquí podedes ver o vídeo resumo das actuacións editado polo Equipo de TICS:
O Equipo de Actividades Extraescolares e Complementarias participou no Programa Recíclate con Sogama con todo o alumnado de Ed. Infantil e Primaria. Deixamos aquí o enlace á memoria de todas as actividades realizadas.
Nas últimas sesións do club de lectura de 5º e 6º de Ed. Primaria o alumnado realizou recomendacións lectoras na radio, fixeron visionado de todos os booktrailers creados por eles na Sala de Cine e despediron o curso levando un pequeno agasallo de recordo.
O alumnado de 6º de Educación Primaria para despedir o curso estiveron preparando unha obra de teatro titulada "Mamasiña, que medo!" de Chus Pereiro. Na derradeira semana do periodo lectivo invitaron a todo o alumnado e aos seus familiares á biblioteca para ver a súa representación. Houbo que facer quendas, así o luns viron a obra os nenos e nenas de Ed. Infantil e 1º Ciclo de Primaria; o martes acudiron os de 2º Ciclo de Primaria e o mércores as familias que ademáis trouxeron alimentos non perecederos para doar a un Banco de Alimentos.
Aquí vos deixamos a gravación da obra e a galería de fotos.
"De mente e corpo en forma estarás, se ves a ler e a pedalear"
O alumnado de 1º e 2º de Educación Primaria realizou unha saída ao Museo de Pontevedra onde aprenderon a facer traballos con arxila nun divertido obradoiro.
Ó longo deste curso o clube de lectura de 5º de Educación Primaria realizou diferentes booktrailers dalgúns dos libros lidos.
O alumnado de 6º de Educación Primaria acudiu ao IES As Bizocas para coñecer o que será o seu novo centro educativo no vindeiro curso. Visitaron as instalacións do centro, escoitaron as charlas informativas da orientadora e as opinións do alumnado que xa está cursando alí a ESO e que moitos deles foron alumnos e alumnas do noso centro nas etapas de Infantil e Primaria. A verdade é que chegaron ao cole moi contentos e desexando comezar o vindeiro curso.
As nenas e nenos de 6º de Educación Primaria estiveron investigando a historia contemporánea e realizaron estes marabillosos traballos sobre a Primeira e Segunda Guerra Mundial.
Martina e Sara transformáronse en dous terribles ditadores para contar en primeira persoa que aconteceu naquela época. Podedes velo neste vídeo!
Dende o luns 22 ata o venres 26 de Abril o Equipo de biblioteca organizou un ano máis os apadriñamentos lectores para celebrar a Semana do libro. Todos os cursos dende 4º de Infantil ata 6º de Primaria pasaron pola biblioteca, uns como padriños e madriñas e outros como afillados e afilladas. En cada quenda os maiores tiñan que sacar un papeliño ao chou dunha caixa para saber cal sería o seu afillado ou afillada. Unha vez formadas as parellas ou grupos, os máis pequenos escollían os libros que querían que lles leran os maiores. Tamén lles dimos a libertade de escoller o recuncho da biblioteca que máis lles gustaba para facer a actividade. Finalmente fixemos a foto oficial de todos xuntos no escenario do noso miniteatro. Preme na imaxe para ver a galería de fotos.
O 23 de Abril, Día do libro, fomos invitados pola Biblioteca Municipal de O Grove para ver unha obra de teatro baseada no Quixote e dirixida por Laura Sarasola da compañía Pedras de Cartón.
O martes 9 de Abril os membros do club de lectura de 5º e 6º de Educación Primaria realizaron unha excursión a Santiago de Compostela con motivo da lectura do libro titulado "Formigas. Misión Camiño Santiago" de Pere Tobaruela. Compartimos a viaxe co Club de lectura do Ceip As Bizocas que tamén leron o mesmo libro e resultou unha xornada de convivencia marabillosa na que non só aprendemos a historia do Camiño e de Santiago, senón que fixemos un roteiro polo casco histórico entrando pola Porta do Camiño, atravesando rúas e vendo iglesias e capelas, varias prazas entre elas a de Cervantes para finalizar entrando na Catedral. Despois nos diriximos ao Parque da Alameda para repoñer forzas cunha boa comida. Continuamos a nosa ruta para ver estatuas como a das Marías, o noso Valle-Inclán sentado nun banco, Rosalía de Castro, Federico García Lorca.... e rematamos no parque infantil onde había moitos xogos.
Para rematar o 2º trimestre, celebramos o Día da Poesía cun recital realizado polos nenos e nenas do Club de Lectura de 5º e 6º de Educación Primaria. Fixéronse dúas quendas, a primeira para os maiores do cole e a segunda para os pequenos. Como no club de lectura están a investigar sobre a literatura grovense para o PDI 50 Anos de Historia, escolleron poemas da escritora Carmen Eva Gondar Rey do seu libro Fantasía.
Despois do recital, aproveitamos para facer o sorteo do xogo-concurso do Día da muller.
